Slava

Sit og hlusta á Söngva og dansa dauðans eftir Mússorgskíj, með Galínu og Slava við píanóið. Þar var hann ekki síður snillingur en á sellóið.  Mstislav Rostropovitsj var gegnheill listmaður sem gerði heiminn betri.

Einkennilegt að í frétt Reuters á mbl.is, af útför listamannsins skyldi nafn konu hans, Galínu Vishnévskaju ekki nefnt á nafn, hvað þá að hún væri sömuleiðis einn af mestu listamönnum okkar tíma.  Einkennilegt.

Ævisaga Galínu er skyldulesning.  Hún heitir einfaldlega Galína og kom út í íslenskri þýðingu á níunda áratugnum.  Þar segir hún frá stórbrotinni ævi, hvernig hún þraukaði umsátrið um Leningrad með ömmu sinni, nær hungurmorða; frá Stalín og öðrum stjórnmálamönnum sem ýmist elskuðu hana eða hötuðu; frá ástinni á Slava; frá Prokoffijev, Sjostakovitsj og Solzhenitzyn; flóttanum frá Rússlandi og svo mörgu öðru.

Fáar ævisögur ef nokkur, hafa hrifið mig líkt og þessi.     

Rostropovítsj látinn

Athugasemdir

[Kristín Björg Þorsteinsdóttir, 29.4.2007 kl. 20:35]

Ég gleymi aldrei þegar ég heyrði hann i Laugardalshöllinni á listahátið. Ég fór heim í hléi því ég varð fyrir svo miklum áhrifum að ég treysti mér ekki til að hlusta á meir.

Og bókin hennar Galinu var frábær - hún var nú helv.montin kellingin - mátti kannski vera það....

[Bergþóra Jónsdóttir, 30.4.2007 kl. 00:45]

Nei það var önnur Galína sem var í LHÍ.  Það verður enginn svikinn af þessari ævisögu.  Þessi kona upplifði allt, sárustu fátækt og örbirgð og frægð og frama, hún var glæsipía, en líka hugrökk baráttukona.  Mig minnir að Guðrún Egilson hafi þýtt bókina, og hún heitir einfaldlega Galína.

[Bergþóra Jónsdóttir, 30.4.2007 kl. 00:48]

Já, er það ekki óþolandi, að jafn virt fréttastofa og Reuters skuli ekki sjá sóma sinn í því að nefna hana á nafn, þótt hún sé í mynd í drjúgum hluta fréttarinnar.  Galína átti sinn stóra þátt í frama mannsins síns, og án hennar klækja og greindar hefðu þau ekki getað komist upp með að vera vinir Solzhenitzyns hvað þá flúið Rússland.

[Viðar Eggertsson, 30.4.2007 kl. 14:08]

Sammála, frábær bók og frábær söngkona og frábær manneskja!

En, varðandi fréttina og dularfullt hvarf Galínu hjá Reuter. Ef þú værir á básnum þínum á Mogga, þar sem þú átt heima, hefði ekki svona slys orðið á Mogganum! En Reuter má bara skammast sín. En hver stendur vaktina þína á Mbl.is? Sá ætti að skammast sín, hann getur ekki skýlt sér á bak við Reuter, það er engin afsökun.

Allir almennilegir menningaskrifarar vita um Galinu, en kannski er enginn slíkur á vinsælasta fréttavef landsins?